काठमाडौं । भौतिक पूर्वाधार तथा यातायात मन्त्री देवेन्द्र दाहालले सरकारले कसैलाई पनि इम्बोस्ड नम्बर प्लेट जडानका लागि जबरजस्ती गर्न नखोजेको बताउनुभएको छ । इम्बोस्ड नम्बर प्लेटका विषयमा सांसदहरुले उठाएका प्रश्नको जवाफ दिँदै मन्त्री दाहालले जडान नगर्नेहरुलाई जरिवाना र कारबाहीसमेत नगरिने जानकारी दिनुभयो ।
प्रतिनिधि सभामा सांसदहरूका प्रश्नको जवाफ दिँदै मन्त्री दाहालले सरकारले जवरजस्ती इम्बोस्ड नम्बर जडान गर्न भनेको भनेर अनावश्यक हल्ला फैलाइएको आरोप लगाउनुभयो । तर, यातायात व्यवस्थापनका लागि यो काम गर्नैपर्ने स्थिति रहेको उहाँको भनाइ थियो ।
सडक इजाजत पारदर्शी हुने, सडक यातायात थप व्यवस्थित बन्ने र सवारी चोरी र आपराधिक गतिविधि नियन्त्रण हुने दाबी पनि मन्त्री दाहालले गर्नुभयो ।
