विराटनगर । मोरङको ग्रामथान गाउँपालिकाका अध्यक्ष नमोनारायण माझीको गतिविधका कारण अहिलेसम्म गाउँपरिषद्को बैठक बस्न नसक्दा समस्या भएको उपाध्यक्ष तथा वडाध्यहरूले गुनासो गरेका छन् ।
अध्यक्षले गाउँपरिषद् बैठक बसाउन पहल नगरेकैले चालु आर्थिक वर्षको बजेट पनि आउन नसकेको आरोप उनीहरूले लगाएका छन् । अध्यक्ष माझी एकल ढंगले अगाडि बढेको, गैरकानुनीरूपमा निर्णय गरेको उपाध्यक्ष तथा वडाध्यक्षहरूको दाबी छ ।
उपाध्यक्ष गुणवतीदेवी थारुले आफू न्यायीक समितिलगायतका ७ वटा समितिको संयोजक भए पनि अध्यक्ष माझीले निस्काशन गरेको भन्दै आपत्ति जनाउनुभएको छ ।
ग्रामथान गाउँपालिकाका अध्यक्ष जयप्रकाश गच्छदारको मृत्यु भएपछि गत वर्ष मंसिर १६ गते उपनिर्वाचन भएको थियो । माझी अध्यक्षमा निर्वाचित भएर आएपछि नियमले तोकेको अधिकारभन्दा बढी अधिकार अभ्यास गर्न खोजेको अरू जनप्रतिनिधि तथा कर्मचारीको गुनासो छ ।
