काठमाडौं । प्रतिनिधिसभाले संघीय निजामती सेवा विधेयक त्रुटिपुर्ण रूपमा पारित गरेपछि सांसदहरू अहिले डराउन थालेका छन ।
पढ्दै नपढि विधेयक पारित गर्दा निजामती विधेयकको कुलिङ अफ पिरियडमा जालसाजी भएको विषयले सांसदहरूको क्षमतामाथि नै प्रश्न उठायो । अहिले सांसदहरू विधेयक पारित गर्दा पटकपटक पढेर तथा हस्ताक्षर गरेर त्रुटि नहोस् भन्ने तर्फ सचेत देखिएका छन ।
कुलिङ अफ पिरियड राख्नु हुँदैन भनेर कडा लबिङ गर्ने संसद्का महासचिव र कुलिङ अफ पिरियड हटाउन अन्तिम अवस्थासम्म पनि प्रयास गरिरहन्छु भन्ने मुख्य सचिव अहिले पनि पदमै हुनुहुन्छ ।
उहाँहरूले कुलिङ अफ पिरियडविरूद्ध चलखेल गर्न सक्ने पर्याप्त आधार छन् । यसकारण प्रतिनिधिसभामा कुलिङ अफ पिरियडमा भएको चलखेल राष्ट्रिय सभामा पनि नहोला भन्न सकिँदैन ।
प्रतिनिधि सभामा कर्मचारीले तयार पारेको प्रतिवेदन समितिमा छलफल नभएको र संसद्मा पेस हुँदा पनि अध्ययन नगरेका कारण पनि गल्ती भएको थियो । तर यो गल्तीबाट पाठ सिकेका सांसदहरू अहिले राष्ट्रिय सभाको विधायन व्यवस्थापन समितिमा छलफल भइरहेको संघीय निजामती सेवा विधेयकमा फेरी त्रुटि नहोस् भनेर सचेत बनेका छन ।
प्रतिनिधिसभाको राज्य व्यवस्था तथा सुशासन समितिले पारित गरेको विधेयक प्रतिवेदन संसद्मा लैजानु अघि सांसदहरूले हेरेनन सिधैं पारित गरिदिए । सांसदहरूले नपढि पारित गर्दाको परिणाम विधेयकमा जालसाजी भयो र त्रुटिपुर्ण विधेयक पारित भयो ।
उनीहरूको भनाइ छ प्रतिनिधि सभाले गरेको त्रुटिले पाठ सिकायो । राष्ट्रिय सभाका सांसदहरू आफ्नो गल्ती नहोस भनेर सचेत भएका त छन् नै, त्यो भन्दा मु्ख्य कुलिङ अफ पिरियडको ठाडो विरोध गर्ने र अन्तिम अवस्थासम्म पनि विरोध गरिरहन्छु भन्ने संसद्का महासचिव पद्म प्रसाद पाण्डेय र मुख्यसचिव एकनारायण अर्याल अहिले पनि उच्च र प्रभावशाली पदमा रहेकाले प्रभाव पर्ला कि भन्ने चिन्ता उनीहरूमा छ ।
गल्तीबाट पाठ सिकेका राष्ट्रिय सभाका सांसद मात्र होइन, प्रतिनिधिसभाका सांसदहरूलाई पनि उत्तिकै झस्काइरहेको छ । गत भदौ ५ गते कृषि समितिबाट पारित भएको भुमि विधेयकमा सांसदहरूले हस्ताक्षर गर्नु अघि विधेयक दोहोर्याएर पढे र त्यतिले नपुगेर चलखेल होलाकी भन्ने डरले पारित विधेयकमा हस्ताक्षर समेत गरेर सुरक्षित गरे ।
उनीहरूले भाषादेखि विधेयकमा भएका विषयवस्तु सचिवलाई पढ्न समेत लगाएर मात्र पारित गरे । त्यसैगरी भदौ ५ मै पारित भएको विद्यालय शिक्षा विधेयकमा पनि सांसदहरू पारित गर्ने बेलामा गम्भिर भए ।
बैठकले टुङ्ग्याइ सकेको विधेयक त्यतिकै पारित हुन दिएनन् । फेरी अर्को बैठक राखेर अध्ययन गरेर विधेयक हरेक दफामा सुनिश्चितता गरेर मात्र पारित गरे । त्यसमा पनि समितिका सभापति मात्र होइन सदस्यहरूसमेतले हस्ताक्षर गरे ।
गल्ती गर्नेलाई राजनीतिक वा प्रशासनिक प्रभावमा उन्मुक्ति दिएर कारवाही नगरिदा संसद्का विधेयकमा कति बेला के हुन्छ भन्न नसकिने अवस्था छ ।
