मोदीले गरे ओलीसँग भेट

भाद्र १५, २०८२ |कान्तिपुर टीभी संवाददाता
मोदीले गरे ओलीसँग भेट

काठमाडौं । भारतीय प्रधानमन्त्री नरेन्द्र मोदीले चीनकाे थियानजिनमा प्रधानमन्त्री केपी शर्मा ओलीसँग अनौपचारिक भेट गर्नुभएकाे छ । 

चीनका राष्ट्रपति सी चिनफिङ र उहाँकी धर्मपत्नी पेङ लियुआनद्वारा शाङ्घाई सहयोग सङ्गठन (एससीओ) प्लस को शिखर सम्मेलनमा सहभागी मुलुकका लागि आयोजित स्वागत समारोहमा उहाँहरूबीच अनौपचारिक कुराकानी भएको हो ।

चीनको थियानजिन मेइजियान सम्मेलन केन्द्रमा आयोजित सांस्कृतिक प्रस्तुतिसहितको रात्रिभोजमा प्रधानमन्त्री ओलीसँग भएको अनौपचारिक भेटको तस्बिर समकक्षी मोदीले आफ्नो सामाजिक सञ्जाल एक्समा सार्वजनिक गर्नुभएको छ । उहाँले थियानजिनमा नेपालका प्रधानमन्त्री ओलीलाई भेट्न पाउँदा खुसी लागेको बताउनुभएको छ । 

भारतीय प्रधानमन्त्री मोदीले प्रधानमन्त्री ओलीसँगको भेटलाई विशेष अवसरका रूपमा लिँदै सामाजिक सञ्जालमा लेख्नुभएकाे छ, “भारत र नेपालको सम्बन्ध गहिरो, ऐतिहासिक र विशेष छ, यसले दुई देशका जनताबीच नजिकको आत्मीयता झल्काउँछ ।”

थियानजिनमा भएको उक्त भेटलाई दुई देशबीचको मित्रता र सहकार्यका लागि सकारात्मक कदमका रूपमा लिइएको छ ।


Image

कान्तिपुर टीभी संवाददाता

Kantipur TV HD, the most popular TV channel in Nepal, brings Nepal to its audiences. Its programmes provide in-depth analyses about the issues of the day and reflect the people’s voice.