काठमाडौं । विश्वसम्पदा सूचीमा सूचीकृत ललितपुरको पाटन दरबार क्षेत्रका ऐतिहासिक मन्दिरहरूको पुननिर्माण तीव्र रुपमा चलिरहेको छ अहिले ।
तर तलेजु मन्दिरको नित्यपुजाका क्रममा बजाइने २ सय ८८ वर्ष पुरानो ठूलो घण्टा भत्किने अवस्थामा पुग्दासमेत कसैले चासो दिएको छैन । जबकि सम्पदा अवलोकनका लागि आउने विदेशी पर्यटकसँग शुल्क असुल्ने ललितपुर महानगरले समेत यसबारे वास्ता गरेको छैन ।
भूकम्पले क्षतिग्रस्त घण्टा जोखिमपूर्ण बनेको भन्दै तत्काल पुननिमार्ण गर्नुपर्ने माग तलेजुका पुजारीहरूले गरेका छन् । पाटन दरवारस्थित तलेजु मन्दिरको ठीक अगाडि १५ फिटभन्दा अग्ला दुई वटा खम्वामा रहेको यो ठूलो घण्टा २०७२ को भूकम्पपछि भत्किने अवस्थामा पुगेको छ ।
तलेजुको नित्य पुजाका अवसरमा दिनहुँ बजाउनुपर्ने घण्टा जोखिमपूर्ण बनेकै कारण केही वर्षदेखि विजय दशमीको नौ दिनमात्र मात्र बजाउने गरिएको छ । जनतालाई सूचना प्रदान गर्न नेपाल सम्वत ८ सय ५७ मा विष्णु मल्लको पालामा निर्माण भएको घण्टा अहिले जोखिमपूर्ण बनेको तलेजुका पुजारीहरू बताउँछन् ।
पुरातत्व विभाग र गुठी संस्थान मातहत रहेको घण्टाको मुनि तीनतिर नौवटा पसल छन् । तर घण्टा मर्मत वा पुननिर्माणतर्फ कसैको ध्यान गएको छैन, जसले गर्दा घण्टाको बाटो भएर हिँड्नसमेत जोखिमपूर्ण रहेको स्थानीय बताउँछन् ।
पाटनको पुरातात्विक मठ, मन्दिर, घण्टालगायतका सम्पदाहरू देखाएर विदेशी पर्यटकसँग प्रतिव्यक्ति एक हजार रूपैयाँ उठाउने महानगरपालिकाले यति ऐतिहासिक सम्पदा भत्किन लाग्दासमेत पुननिमार्णमा चासो नदिएको स्थानीयको गुनासो छ ।
विश्व सम्पदा सूचीमा सूचीकृत पाटनका प्राचिन मन्दिरहरू नरसिंह तथा भागदेग महादेव मन्दिर पुनर्निर्माणका क्रममा छन् । ती मन्दिरहरूको पुनर्निर्माणमा ढिलाइ भएको छ भने तलेजु, भिमसेन कृष्णमन्दिरलगायतका सम्पदाको पुनर्निर्माण सकिएको छ ।
पुरातात्विक सम्पदा देखाएर विदेशी पर्यटकसँग पैसा असुल्ने ललितपुर महानगरले ऐतिहासिक मठ मन्दिर, घण्टाजस्ता सम्पदाहरूको पुननिर्माणमा पनि ध्यान दिन जरुरी छ ।
