दार्चुला/ बिहीवार रातिको बर्षाका कारण जिल्लाको दुहु गाउँपालिका-३ को कार्यालयमा पहिरोले क्षति पुगेको छ । अविरल वर्षाका कारण कार्यालय भवन माथिबाट आएको पहिरोले वडा कार्यालय भवन क्षतिग्रस्त भएको वडाध्यक्ष देबबहादुर बमले बताउनुभयो।
वडाध्यक्षका अनुसार भवनभित्रै पहिरो पसेर ठूलो क्षति भएको छ । जसका कारण वडा कार्यालयबाट सेवा प्रवाहमा समस्या आएको छ । पहिरो भित्रैसम्म पसेका कारण क्षतिको विवरण संकलनका समस्या भईरहेको उहाँको भनाई छ ।
त्यस्तै दार्चुलाको महाकाली नगरपालिका-२ बडालीगाउँका आधा दर्जन घर पहिरोको जोखिममा परेका छन् । स्थानीय गोपालसिह बडाल, पदमसिंह बडाल, करनसिंह बडाल, जमनसिंह बडाल, हरकसिंह बडाल र लक्ष्मनसिंह बडालको घर पहिरोको जोखिममा रहेको प्रहरी निरीक्षक रावतले बताए । घर पहिरोको जोखिममा परेपछि छिमेकीको घरमा सरेको स्थानीय गोपालसिह बडालले बताउनुभयो ।
अहिले पहिरो खसेको ठाउँमा प्रहरीको टोली परिचालन गरिएको र थप विवरण आउँन बाँकी रहेको प्रहरीले जनाएको छ ।
