सिन्धुपाल्चोक। चीनसँगको रसुवा नाका बाढीका कारण अवरुद्ध भइरहेका बेला अर्को प्रमुख व्यापारिक सीमा पनि बाढी पहिरोले प्रभावित भएको छ । तातोपानी नाका हुँदै नेपाल भित्र्याउन लागिएका सरसामान सहितका करिब १५ सय कन्टेनर नाकामै रोकिएका छन् ।
तातोपानी नाका जोड्ने सडक खण्डको इको क्षेत्रमा वर्षायाम सुरु भएदेखि नै माथिल्लो भू-भाग लगातार बगिरहेको छ । पटक-पटक बाटो अवरुद्ध हुँदा भरियालाई बोकाएर वा तुइनबाट सामान ल्याउन व्यवसायीहरु बाध्य भएका छन ।
दुई महिनादेखि उद्योग वाणिज्य संघ सिन्धुपाल्चोकका अध्यक्ष बुद्धराज बस्नेतको नेतृत्वमा व्यवसायीहरु विहानैदेखि वेलुकीसम्म पहिरो क्षेत्रमै बसेर कोदारी र इको पहिरो पन्छ्याएर बाटो खुलाउने प्रयास गरिरहेका छन् । माटो बगिरहने र ठुलो पहिरो पर्नसाथ बाटो बन्द हुने क्रम रोकिएको छैन । नाकाको यो पीडादायी अवस्थामा केन्द्रीय सरकारले खासै चासो दिएको देखिदैन।
असारयता मात्र यो अवरुद्ध भएको यो छैटौं पटक हो । पुनर्निर्माण र दीगो व्यवस्थापनमा सरकारले खासै चासो नदिंदा यो नाका वर्षौ देखि उपेक्षित बनेको छ । एक त पहिरोले बाटो अवरुद्ध भैरहने अर्को चीनले समयमा सामान नछोडिदिदा व्यवसायी दोहोरो मारमा परेका छन् ।
यही बाटोकै कारण नेपाली व्यापारीले एक दशकदेखि दुःख पाएका छन् भने अहिले पनि जेनतेन ल्याएको सामान पनि बाढी पहिरो क्षेत्रमा भरिया मार्फत सामान ल्याउन बाध्य भएका छन ।
