विराटनगर । कोशी प्रदेशका सभामुख अम्बर बहादुर विष्टले “कोशी प्रदेश सरकारी कामकाजको भाषा सम्बन्धमा व्यवस्था गर्न बनेको विधेयक, २०८२” को संशोधन प्रस्ताव दर्ता गर्न ७२ घण्टाको समय दिनुभएको छ ।
कोशी प्रदेश सभाको मङ्गलबार बसेको बैठकमा सामाजिक विकास मन्त्री पाँचकर्ण राईले “कोशी प्रदेश सरकारी कामकाजको भाषा सम्बन्धमा व्यवस्था गर्न बनेको विधेयक, २०८२” माथिको छलफलका क्रममा उठेका प्रश्नहरुको जवाफ दिएपछि सभामुख विष्टले संशोधन दर्ताका लागि समय दिनुभएको हो ।
त्यस्तै, आर्थिक मामिला तथा योजना मन्त्री रामबहादुर मगरले “कोशी प्रदेश तथ्याङ्कसम्बन्धी कार्यलाई व्यवस्थित गर्न बनेको विधेयक” प्रदेश सभामा प्रस्तुत गर्नुभएको छ ।
उद्योग, पर्यटन तथा वातावरण समितिका सभापति रामदेव यादवले कोशी प्रदेश वन ऐन, २०७७ लाई संशोधन गर्न बनेको विधेयकसम्बन्धी समितिको प्रतिवेदन प्रदेश सभामा पेस गर्नु भएको छ ।
प्रदेश सभाको शून्य समयमा बोल्दै प्रदेश सभा सदस्यहरूले समसामयिक विषयमा सरकारको ध्यानाकर्षण गराएका छन् । शून्य समयमा बोल्ने प्रदेश सभा सदस्यहरुले बाढी, पहिरोले पुर्याएको क्षति मुल्याङ्कन गरी राहत दिन, सूचना माथिको पहुँच बढाउन, राजमार्ग छेउ-छाउ खुलेका होटल तथा रेष्टुराको अनुगमन गरी अखाद्य वस्तुको बिक्री वितरण रोक्न, पर्यटक प्रहरीको व्यवस्था गर्न माग गरेका छन् ।
शून्य समयमा डोल्मा तामाङ, सपना दर्जी, गोम्बु शेर्पा, नम्बर लाल धिमाल, मीना श्रेष्ठ र शोभा चेम्जोङले समसामयिक विषयमा सरकारको ध्यानाकर्षण गराएका थिए ।
