मोरङ । नेपाली कांग्रेस संसदीय दलका प्रमुख सचेतक गोपाल तामाङले भाषा आयोगले सूचिकृत गरेका १३ वटा भाषाको बाहुल्यता भएको स्थानीय तहमा सरकारी कामकाजको भाषाको रुपमा प्रयोग गर्न प्रदेश सरकारले समन्वय र सहयोग गर्नुपर्ने बताउनु भएको छ ।
प्रदेश सभाको सोमवारको बैठकमा विशेष समय लिएर बोल्दै प्रमुख सचेतक तामाङले विज्ञ तोली गठन गरी भाषा अनुवादकको व्यवस्था गरेर सरकारी कामकाजको भाषालाई व्यवस्थित गर्नुपर्नेमा जोड दिनुभयो । सबै जातजातीले अपनत्व लिने गरी प्रदेश सरकारले भाषा सम्बन्धी व्यवस्था गर्नुपर्ने तामाङको भनाइ थियो ।
बैठकको शून्य समयमा बोल्दै प्रदेश सभा सदस्यहरुले समसामयिक विषयमा सरकारको ध्यानाकर्षण गराएका छन् । प्रदेश सभा सदस्य ममता तामाङ मगरले सडक मार्गलाई सुरक्षित बनाउन सरकारको ध्यानाकर्षण गराउनु भयो । त्यस्तै अर्की प्रदेश सभा सदस्य गीता रानी महतोले भाषा विधेयकमा थारु र मगही भाषालाई पनि समेट्न माग गर्नुभयो । लोकसेवा आयोगले गर्ने विज्ञापनामा पिछडा वर्गलाई आरक्षण गर्न महतोले माग गर्नुभयो ।
गोरखापत्रमा मगही भाषाको पेज सञ्चालन गर्न र रेडियो नेपालमा मगही भाषाको कार्यक्रम सञ्चालन गर्न महतोले सरकारसँग माग गर्नुभयो । दमकको बाल अस्पतालको भवन नहुँदा विरामीले उचित उपचार नपाएको भन्दै अर्का प्रदेश सभा सदस्य नम्बर लाल धिमालले उक्त अस्पतालमा भवन निर्माण गर्न सरकारको ध्यानाकर्षण गराउनु भयो ।
