सप्तरी । प्रहरीको गोली लागेर सप्तरीको राजगढ गाउँपालिका-२ कमलपुरका लालुप्रसाद यादवको मृत्यु भएपछि स्थानीयले हिजोदेखि थालेको आन्दोलन स्थगित भएको छ ।
जिल्ला प्रशासन कार्यालयमा बिहिबार बसेको सर्वपक्षीय बैठकबाट पाँच बुँदे सहमति भएपछि आन्दोलन स्थगित भएको हो । घटनाको छानबिन गर्न उच्चस्तरीय समिति गठनका लागि सम्बन्धित निकायलाई अनुरोध गर्ने र समितिको प्रतिवेदनअनुसार क्षतिपूर्ति उपलब्ध गराउने सहमति भएको छ ।
यसैगरी प्रहरी निरीक्षक वीरेन्द्रकुमार यादवलाई घटनाको छानबिन नहुँदासम्म जिम्मेवारीबाट अलग गर्न तालुक निकायमा अनुरोध गर्ने सहमति भएको छ । आन्दोलनरत पक्षले आन्दोलनका सबै कार्यक्रम स्थगित गरी शव परिवारका सदस्यले बुझेर अन्तिम संस्कार गर्ने सहमति भएको प्रमुख जिल्ला अधिकारी भोला दाहालले जानकारी दिनुभयो ।
