पाँचथर । पाँचदिनदेखि हराइ रहेका याङवरक–१ च्याङथापुका दाजुबहिनी मृत अवस्थामा भेटिएका छन ।
उनीहरुको शव मङ्गलबार याङवरक–१ को बिरुवा खोलामा मृत अवस्थामा भेटिएको हो । स्थानीय बिर्ख राईका ९ वर्षीय छोरा शिशिर राई र उनकी ६ वर्षीया बहिनी नानुमा राई शुक्रबार बिहानैदेखि सम्पर्क विहिन थिए ।
याङवरक–१ का वडाध्यक्ष राजेन्द्र खालिङका अनुसार उनीहरु विरुवा स्थित पूर्ण आधारभुत विद्यालय माथि रहेको आफ्नो घरमा हजुरबा हजुरआमासँग बस्ने गर्थे । साउन १४ गते साँझ विद्यालय मुनी रहेको आफ्ना पिता बस्ने घरमा आएका थिए । घर आइपुग्दा पितालाई नभेटेपछि छिमेकी कलम बान्तावाको घरमा बास बसेका उनीहरु साउन १५ गते शुक्रबार हजुरबा हजुरआमा बस्ने घर जान भन्दै हिडेपछि सम्पर्क विहिन भएका थिए ।
उनीहरुलाई पूर्ण आधारभुत विद्यालय नजिकै विरुवा खोलाले बगाएको अनुमान गरिएको छ । जिल्ला प्रहरी कार्यालय पाँचथरका प्रमूख कौशलकुमार बुढाथोकीका अनुसार बालबालिका बेपत्ता भएको खवर प्राप्त भएसँगै प्रहरी चौकी च्याङथापु र जिल्ला प्रहरी कार्यालय पाँचथरको टोली सहित स्थानीयले खोजी गर्ने अवस्थामा बाल बालिकालाई मृत अवस्थामा फेला पारेको जानकारी दिए ।
उनीहरुको शव पोष्टमार्टमका लागि जिल्ला अस्पतालमा ल्याउने तयारी भइरहेको पनि बुढाथोकीले बताए ।
