रामेछाप । रामेछापको हलेदे-धोबी-सिरिसे-ढाडे सडक खण्डअन्तर्गत लिखुतामाकोशी गाउँपालिका-७ तिल्पुङ क्षेत्रमा कालोपत्रे गरिएको सडक एक महिनामै उप्किन थालेको छ ।
१२ करोड ६५ लाख ५४ हजार रूपैयाँ लागतमा निर्माण गरिएको सडकमा अहिले पहिरो, भत्किएको वाल र टालटुल कामको कारण जनजीवन जोखिममा परेको छ।
उक्त सडक आयोजनाबारे पटक-पटक सरोकारवालालाई ध्यानाकर्षण गराइए पनि पूर्वाधार विकास कार्यालयले सुनुवाइ नगरेको स्थानीयको गुनासो छ। यो सडकको ठाउँ-ठाउँमा कालोपत्रे उप्किएको र भित्तामा लगाइएको सेर तथा मेसिनरी वालसमेत भत्किएको लिखुतामाकोशी गाउँपालिका-७ की स्थानीय मेनुका आले मगरले बताउनुभयो ।
यो सडक निर्माणका क्रमममा सयौँ ठाउँमा उप्किएको कालोपत्रे टालटुल पारेर योजना पास गरिएकाले अहिलेको अवस्था आएको उहाँको भनाइ छ । सडक विस्तारका क्रममा भित्ता संरक्षणको आवश्यक ध्यान नदिई गरिएको कटिङले पहिरो निम्त्याएको गाउँपालिका अध्यक्ष केशव महतले बताउनुभयो ।
स्थानीय सरकारलाई तगारोको रूपमा हेर्ने प्रवृत्तिका कारण आवाज उठाउँदा पनि नसुनेको र अहिले ढ्याङ्ग्रेमै मात्र १५ घर परिवार पहिरोको जोखिममा रहेको उहाँले बताउनुभयो । अध्यक्ष महतका अनुसार, दैनिक रूपमा पहिरो पन्छाउन गाउँपालिकाले डोजर परिचालन गर्नुपर्दा आर्थिक भार थपिएको छ।
सडक निर्माणमा गर्दा गरिएको लापरबाहीले लगातार पहिरोले गइरहेकाले सवारी आवागमन र सर्वसाधारणलाई यात्रामा जोखिम भएको उहाँले बताउनुभयो । पहिरो नियन्त्रणको लागि न निर्माण व्यवसायी र पूर्वाधार कार्यालयले कुनै चासो नदिएको उहाँको गुनासो छ ।
प्रमुख जिल्ला अधिकारी श्यामकृष्ण थापाले पहिरोले केही बारी बगाए पनि बस्ती ४ सय मिटर टाढा रहेकाले तत्काल ठूलो जोखिम नरहेको बताउनुभयो । उहाँका अनुसार फिल्डमा रहेको टोलीले पहिरो नियन्त्रणका लागि पानीको बहाव कटाउने जस्ता कामहरू गरिरहेको छ।
बागमती प्रदेश सरकारको बजेटमा पूर्वाधार विकास कार्यालय रामेछाप मार्फत श्री गौरीशङ्कर-रूपाकाली जेभीले ४.२ किलोमिटर सडक कालोपत्रे गरेको थियो। निर्माण कम्पनीले २०८० असार १८ गतेबाट काम थालेको भए पनि २०८२ असारभित्र सकिएको योजना गुणस्तरहीन भएको स्थानीयको गुनासो छ।
