काठमाडौं । राष्ट्रपति रामचन्द्र पौडेलले आगामी फागन २१ का लागि तोकिएको निर्वाचनलाई सफल बनाउन सञ्चार माध्यामहरूले अझ प्रभावकारी ढंगले काम गर्नुपर्ने आवश्यकता रहेको बताउनुभएको छ ।
आइतबार सार्वजनिक सेवा प्रशारण तथा एनटिभी वर्ल्डको औपचारिक शुभारम्भ समारोहमा बोल्दै उहाँले सो कुरा बताउनुभएको हो । राष्ट्रपति पौडेलले युवा पुस्ताको सुशासन र विकासप्रति प्रकट भएको चाहनालाई ध्यान दिँदै संविधान र लोकतन्त्रलाई अझ उन्नत र सुदृढ बनाउन सो निर्वाचन घोषणा गरिएको उल्लेख गर्नुभयो ।
निर्वाचनलाई सफल बनाउनका लागि सञ्चार माध्यामहरू अझ बढी क्रियाशील हुनुपर्ने उहाँले स्पष्ट पार्नुभयो । उहाँले सरकारी सञ्चार माध्यामहरूले लोकतन्त्रको सुदुढीकरणमा बढी जोड दिनुपर्ने समेत बताउनु भयो । राष्ट्रपति पौडेलले नेपालको संस्कृति, भेषभुषा, भौगोलिक विविधता, प्राकृतिक सौन्दर्यता, पर्यटन, धार्मिक तथा सांस्कृतिक धरोहरहरू र नविन सोच तथा उपलब्धिहरूलाई विश्व समक्ष चिनाउन एनटीभी वर्ल्ड च्यानलले महत्वपूर्ण भुमिका खेल्ने विश्वास समेत व्यक्त गर्नुभयो ।
राष्ट्रपति पौडेलले जनतालाई सही सूचना दिनेकुरामा सञ्चार माध्यामहरूले गम्भिरतापूर्वक काम गर्नुपर्ने पनि बताउनु भयो ।
