काठमाडौं । ऊर्जा, जलस्रोत तथा सिँचाइमन्त्री दीपक खड्काले निजी क्षेत्रलाई सँगै लिएर ट्रान्समिसन लाइन बनाउने गरी सरकार अघि बढेको बताउनुभएको छ ।प्रतिनिधि सभाको पूर्वाधार विकास समितिको बैठकमा बोल्दै उहाँले सबै ठाउँमा ट्रान्समिसन लाइनको सुनिश्चितता गरेर सरकार अघि बढिरहेको बताउनुभयो ।
उहाँले सरकारले एक्लै ट्रान्समिसन लाइन बनाउन नसक्ने ठानेर नै सरकारले निजी क्षेत्रलाई पनि ट्रान्समिसन लाइन बनाउने किसिमले आबद्ध गरेर अघि बढेको बताउनुभयो । विद्युत् विधेयक रोक्नुपर्ने कुनै आवश्यकता नरहेको पनि बताउनुभयो ।
मन्त्री खड्काले भन्नुभयो, “अहिले सरकारले एक्लै ट्रान्समिसन लाइन बनाउन सकेन । त्यसैले हामीले प्राइभेट क्षेत्रलाई पनि ट्रान्समिसन लाइन बनाउने किसिमको आबद्ध गरेर अघि बढाइसकेका छौं । अब ट्रान्समिसन लाइनको पनि समस्या हुँदैन । अलग ढंगले व्याख्या भएका कारणले केही द्विविधा सिर्जना भएको हो । त्यो कुरा सम्बोधन भइसकेको छ । विद्युत् विधेयक रोक्नुपर्ने कुनै आवश्यकता छैन । न मन्त्रालय र सरकारको धारणा छ, न समितिको । योभन्दा अघि पनि जलस्रोत विधेयक टुंग्याइहालौं भन्ने गरी अघि बढेका हौं । अहिले पनि नवीकरणीय ऊर्जा र विद्युत् विधयेक हामी कहाँ छ । यसलाई एकै चोटि गरौं । नवीकरणीय ऊर्जामा धेरै छलफल भइसकेकाले यसमा धेरै छलफलको आवश्यक छैन जस्तो लाग्छ ।”
