कास्की । पोखरा अन्तर्राष्ट्रिय विमानस्थल सञ्चालनको साढे दुई वर्षपछि हवाई इन्धन डिपो निर्माण भएको छ ।
करिब ७५ करोड रूपैयाँ लगानीमा नेपाल आयल निगमले विमानस्थलभित्र ३६ लाख लिटर क्षमताको इन्धन डिपो निर्माण गरेको हो । दुई वर्षअघि थालिएको डिपो निर्माण सम्पन्न भई अहिले परीक्षणमा रहेको र साउन पहिलो सातादेखि सञ्चालनमा आउने बिहीबार पत्रकार सम्मेलन गरी निगमले जानकारी दिएको छ।
डिपोमा एक हजार २ सय किलोलिटर क्षमताका ३ वटा ठूला भण्डारण गृह निर्माण गरिएको छ। भर्टिकल स्टोरेज ट्यांकको उचाइ ब्यास १२ मिटर छ भने डिपो सुरक्षामा उच्च सतर्कता अपनाउन एक हजार २ सय किलोलिटर क्षमताको अलग्गै पानी ट्यांकी र फायर फाइटिङ संरचना बनाइएको छ ।
आगलागीको जोखिमलाई मध्यनजर गर्दै ४ हजार लिटर क्षमताको 'फोम स्टोरेज' ट्यांकसमेत निर्माण गरिएको निगमले जनाएको छ । डिपोले आन्तरिक उडानका लागि तीन महिनासम्मको खपत धान्न सक्छ भने अन्तर्राष्ट्रिय उडान तर्फ दैनिक एक उडानका लागि एक महिनासम्म इन्धन आपूर्ति गर्न सक्ने परियोजना प्रमुख प्रदीपकुमार यादवले बताउनुभयो ।
निगमको ५५ वर्षको इतिहासमा शतप्रतिशत स्वदेशी परामर्शदाता, स्वदेशी निर्माण व्यवसायी र आन्तरिक स्रोतबाट निर्मित आधुनिक सुविधा सम्पन्न हवाई इन्धन डिपो यो पहिलो हो ।
विमानस्थल परिसरमा नौं हजार दुई सय १५ वर्गमिटर जग्गामा नागरिक उड्डयन प्राधिकरणसँग लिज सम्झौता गरी निगमले डिपो बनाएको हो ।
.jpg&w=400&height=300)
