काठमाडौं । श्रम, रोजगार तथा सामाजिक सुरक्षामन्त्री शरतसिंह भण्डारीले रोजगारदाताले आवश्यक पर्ने जनशक्ति नपाउने गरेको बताउनुभएको छ । नेपाल ट्रेड युनियन कांग्रेसले आज काठमाडौंमा गरेको कार्यक्रममा मन्त्री भण्डारीले श्रमिकले काम नपाएको र रोजगारदाताले समेत श्रमिक नपाउने गरेको बताउनुभएको हो ।
रोजगारदातालाई चाहिने जस्तो सीप श्रमिकसँग नहुँदा समस्या हुने गरेको उहाँको भनाइ छ ।
मन्त्री भण्डारीले स्वदेशमा दक्ष जनशक्तिको अभाव हुँदा गहना बनाउने ८ लाख र निर्माण क्षेत्रमा २० लाख विदेशी कामदार आएर काम गरिरहेको दाबी गर्नुभयो । सीपयुक्त कामदार उत्पादन हुन नसक्दा बाहिरबाट ल्याएर काम गराउनुपर्ने अवस्था रहेको उहाँको भनाइ छ ।
