खोटाङ । श्रीमतीले कोदालोले हान्दा श्रीमान्को मृत्यु भएको छ । हलेसी तुवाचुङ नगरपालिका–९ सल्लेस्थित माथिल्लो चिचिङगाका ५१ वर्षीय पाँचकर्ण राईको मृत्यु भएको हो ।
शनिबार मकै बारीमा जोत्ने क्रममा सामान्य वादविवाद हुँदा श्रीमती ५३ वर्षीया रेनुका राईले श्रीमान् पाँचकर्णलाई कोदालोको पासोले टाउकोमा प्रहार गरेकी थिइन् । श्रीमतीको प्रहारबाट बोल्न नसक्ने गरी घाइते भएका राईलाई उपचारका लागि नगर अस्पताल दुर्छिम लगिएको थियो । त्यहाँ उपचार सम्भव नभएपछि हेलिकोप्टरमार्फत उपचारका लागि काठमाडौं लगिएको थियो ।
काठमाडौंमा अन्नपूर्ण न्युरो अस्पतालमा उपचारका क्रममा उनको मृत्यु भएको प्रहरीले जनाएको छ ।
श्रीमती रेनुकालाई प्रहरीले नियन्त्रणमा लिएको छ । राई दम्पतीका तीन छोरी र एक छोरा रहेको सल्लेका वडाध्यक्ष काशीराज राईले बताउनुभयो ।
