काठमाडौं । प्रधानमन्त्री केपी शर्मा ओलीले नेपाली कांग्रेससँगको सहकार्य २०८४ सालपछि पनि कायमै रहने बताउनुभएको छ । नेपाल चेम्बर अफ कमर्सको ७४ औं वार्षिकोत्सव कार्यक्रममा प्रधानमन्त्री ओलीले सरकार परिवर्तनको हल्लाको पछि नलाग्न आग्रह गर्नुभएको हो ।
उहाँले नेपाल चेम्बर अफ कमर्सले नीति निर्माणदेखि आर्थिक विकासमा असाधारण योगदान पुर्याउँदै आएको समेत बताउनुभयो । चेम्बरले सरकार र निजी क्षेत्रबीच पुलको भूमिका खेलेको उहाँको भनाइ थियो ।
प्रधानमन्त्री ओलीले सुशासन कायम गर्न आफू प्रतिबद्ध रहेको बताउनुभयो । उहाँले अहिलेको समय कृत्रिम बौद्धिकताको भएकाले विज्ञान र प्रविधिको दुरुपयोग गरेर अरूलाई फसाउनभन्दा उन्नति र प्रगतिका लागि प्रयोग गर्नुपर्ने जोड दिनुभयो ।
