अस्ट्रेलिया । अस्ट्रेलियन सरकारले मार्च ३१ देखि नेपाललाई उच्च तहको भिजा जोखिमबाट मध्यम तहको भिजा जोखिममा झारेको छ । यससँगै अस्ट्रेलिया अध्ययन गर्न जाने तथा अस्ट्रेलियामा रहेका नेपाली विद्यार्थीले भिजा आवेदन दिँदा थरिथरिका सपोर्टिभ डकुमेन्ट बुझाउनु पर्ने झन्झटबाट मुक्त हुने छन् ।
अस्ट्रेलिया सरकारले आफ्नो देशमा अध्ययन गर्न आउने विद्यार्थीको उद्गम मुलुकलाई विभिन्न तहमा वर्गीकरण गरेको हुन्छ । वर्गीकरण गर्दा अस्ट्रेलियाले उक्त देशको आर्थिक उन्नति, राजनीतिक स्थिरता, भिजा एप्प्रुभल रेट र अस्ट्रेलियामा अध्ययन गरिरहेका विध्यार्थीहरूले भिजा कन्डिसन ब्रेक गरे नगरेको विषयलाई प्रमुख आधार मान्ने गरेको छ ।
अस्ट्रेलिया सरकारको वर्गीकरणअनुसार कम जोखिम अर्थात् लेभल १ मा परेका देशहरूबाट आवेदन दिँदा भिजा लाग्ने सम्भावना उच्च हुन्छ । भिजा आवेदन दिँदा उच्चायोगमा कागजपत्र धेरै बुभाउनुपर्दैन । लेभल २ अर्थात मध्यम तहको भिजा जोखिममा परेका देशहरूले लेभल १ मा परेका देशका विध्यार्थीहरूलेभन्दा अलिक धेरै सपोर्टिभ डकुमेन्ट बुझाउनुपर्छ । तर उच्च जोखिम अर्थात् लेभल तीनमा परेका देशका विद्यार्थीले जति सपोर्टिभ डकुमेन्ट भने बुझाउनु पर्दैन ।
हुन त अस्ट्रेलियाले सामान्यतया ६ छ महिनामा लेभल चेन्ज गरिरहन्छ । नेपाल अब एक खुड्किलो तल झरेसँगै अंग्रेजी भाषा तथा फाइनाइन्सियल डकुमेण्टहरूमा केही सहज हुनसक्छ । तर अस्ट्रेलियामा कलेज तथा विश्वविद्यालयको पनि तह वर्गीकरण हुने हुँदा नेपाली विद्यार्थीले आवेदन दिन लागेको कलेजको तह थाहा पाउन जरुरी छ । सँगसँगै लेभल २ मा बसिरहनु नेपालको लागि चुनौती हुनसक्छ ।
लेभल २ मा झरेपछि नेपाल वा अस्ट्रेलिया जता बसेर भिजा आवेदन दिँदा पनि विद्यार्थीहरूले छोटो समयमा सरलरूपमा भिजा पाउन सक्छन । तर कलेज तथा विश्वविद्यालय चयन गर्दा भने विद्यार्थीले ध्यान पुर्याउनैपर्ने हुन्छ ।
