काठमाडौं । सांसदहरूले विदेशमा रहेका नेपालीहरूको सुरक्षाका लागि परराष्ट्र मन्त्रालयमा अन्तर्राष्ट्रिय सेल गठन गर्नुपर्ने माग गरेका छन् । प्रतिनिधि सभाको आजको बैठकमा सांसदहरूले विदेशमा रहेका नेपालीको सुरक्षा, सहजतापूर्वक स्वदेश फर्काउने र उनीहरूको अवस्थाबारे सहजीकरण गर्न परराष्ट्रमा अन्तर्राष्ट्रिय सेल गठन गर्न माग गरेका हुन् ।
विभिन्न मुलुकबाट नेपालीलाई नेल सहित अमानवीय तरिकाले फर्काइएको प्रति पनि उनीहरूले आपत्ति जनाएका थिए ।
सांसदहरूले अमेरिकाले दिएको अनुदान दुरुपयोगबारे श्वेतपत्र जारी गर्न पनि माग गरेका छन् । शून्य तथा आकस्मिक समयमा बोल्ने क्रममा सांसदहरूले शिक्षकहरूको माग सम्बोधन, नेप्सेको पुनःसंरचना, झापामा स्कुल बस आगजनी घटनाको छानबिन लगायतका माग गरेका थिए ।
यस्तै, स्वास्थ्य सचिव बढुवा प्रकरणमा सांसदहरूले स्वास्थ्यमन्त्रीको राजीनामा पनि माग गरेका छन् ।
