काठमाडौं । बागमती सरकारले बाढीबाट क्षति पुगेका प्रदेशका विद्यालयको पुनर्निर्माण तथा मर्मतका लागि ५२ करोड रुपैयाँ लाग्ने प्रतिवेदन शिक्षा मन्त्रालयमा पठाएको छ ।
मनसुनजन्य बाढी कारण देशभरमा ४ सय २८ विद्यालयमा बाढीले क्षति पुर्याएको थियो । तीमध्ये अधिकांश बागमती प्रदेशका हुन् । शिक्षा मन्त्रालयले पनि विद्यालय पुनर्निर्माणका विषयमा राष्ट्रिय विपद् जोखिम न्यूनीकरण तथा व्यवस्थापन प्राधिकरणसँग समन्वय गरिसकेको बताएको छ ।
यस्तै मर्मतका लागि प्रति पालिका ६ लाख रुपैयाँ र प्रति प्रदेश २ करोड रुपैयाँका दरले पठाइएको शिक्षा मन्त्रालयका प्रवक्ता लक्ष्मीप्रसाद भट्टराइले जानकारी दिनुभयो । तर क्षतिग्रस्त विद्यालयको पुनर्निर्माण र मर्मतका लागि सरकारले ठोस पहल सुरु नगर्दा विद्यार्थीले जोखिमयुक्त विद्यालयमा बसेर पढ्नुपरेको छ।
