चीन भ्रमणका क्रममा को-को सँग हुनेछ प्रधानमन्त्री ओलीको भेटवार्ता ?

काठमाडौं । प्रधानमन्त्री केपी शर्मा ओलीले मंसिर १७ देखि हुने चीन भ्रमणको क्रममा चीनका राष्ट्रपति सी जिनपिङ र राष्ट्रिय जन कांग्रेसका स्थायी समितिका अध्यक्ष झाओ लेजीसँग पनि उच्चस्तरीय भेटवार्ता गर्ने कार्यक्रम तय भएको छ ।

चीनका प्रधानमन्त्री ली छ्याङको निमन्त्रणामा हुन लागेको यस भ्रमणमा प्रधानमन्त्री ओलीको उच्चस्तरीय भेटघाटहरू, द्विपक्षीय वार्ता, र व्यापार मञ्चहरूमा सहभागिता रहने परराष्ट्रमन्त्रालयले जानकारी दिएको छ ।

साथै उहाँले पेकिङ विश्वविद्यालयमा विशेष सम्बोधन गर्ने भएका छन् । पेकिङ विश्वविद्यालयमा प्रधानमन्त्री ओलीले नेपाल-चीन सम्बन्ध, क्षेत्रीय सहकार्य, र समसामयिक अन्तर्राष्ट्रिय मुद्दाबारे आफ्ना विचार प्रस्तुत गर्नुहुनेछ ।

भ्रमणको क्रममा प्रधानमन्त्री ओलीले बेइजिङस्थित नेपाली दूतावास, चाइना काउन्सिल फर द प्रमोशन अफ इन्टरनेशनल ट्रेड र नेपाल उद्योग वाणिज्य महासंघ को संयुक्त आयोजनामा हुने नेपाल-चीन व्यापार मञ्चलाई पनि सम्बोधन गर्ने कार्यक्रम छ।