काठमाडौं । कान्तिपुर मिडिया ग्रुपका अध्यक्ष कैलाश सिरोहियाले लोकरिझ्याँइ र फेक न्यूजका कारण लोकतन्त्रको आधारशिला खतरामा पर्ने अवस्था आएको बताउनु भएको छ ।
कान्तिपुर मिडिया ग्रुपले आयोजना गरको 'कान्तिपुर कन्क्लेभ-२०२४' मा सम्बोधन गर्दै सिरोहियाले नेपालमा पछिल्लो समय भ्रष्टाचार र सुशासनको समस्यासँगै नेतृत्वप्रतिको विश्वास घटिरहेको भन्दै यो समस्या समाधान गर्दै नेतृत्वले विश्वास आर्जन गर्नुपर्ने उहाँको भनाइ छ ।
कन्क्लेभको उद्घाटन गर्दै सिरोहियाले लोकतान्त्रिक आयाममाथि थपिएका चुनौतीमाथि सार्थक बहस गरि लोकतन्त्रलाई मजबुत बनाउन कार्यक्रमको आयोजना गरिएको बताउनुभयो ।
कन्क्लेभको पहिलो दिन आज ‘दोबाटोमा लोकतन्त्र’, ‘नीति र समृद्धि’, ‘लोकरिझ्याइँको लहर’, ‘सामाजिक सञ्जाल : दुईधारे तरबार’, ‘कलम र शक्ति : नेपाली लोकतन्त्र र पत्रकारिताका तीन दशक’ र ‘प्रचण्डपथ : सडक कि सत्ता?’ शीर्षकमा बहस हुनेछन्।
दोस्रो दिन भोलि बिहीबार ‘निर्वाचन सुधार : नीति कि प्रवृत्ति?’, ‘भूराजनीतिक खलबल’, ‘मैदानमा महिला नायक’, ‘सीमापार समृद्धि’, ‘मुख्यमन्त्रीका मुख्य मुद्दा’ र ‘प्रधानमन्त्रीसँग परिसंवाद’ शीर्षकका सत्र रहेका छन्।
एनआईसी एसिया बैंकको मुख्य प्रायोजन र एसियन पेन्ट्सको सहप्रायोजन हुने बहसका १२ सत्रमा १० विदेशीसहित ५५ वक्ता रहनेछन्।
