काठमाडौं । सरकारले अस्थायी रुपमा भए पनि राजमार्गहरु नियमित रुपमा सञ्चालन गर्न प्रयास गरिरहेको जनाएको छ ।
संसद्को पूर्वाधार समितिको बैठकमा भौतिक पूर्वाधार तथा यातायातमन्त्री देवेन्द्र दाहालले हालसम्म ५ वटा मुख्य राजमार्गका ३१ स्थानमा अवरोध भएको यातायात सञ्चालनका लागि प्रयास भइरहेको जानकारी दिनुभएको हो ।
उहाँले बीपी राजमार्गको १२ किलोमिटर सडकको नामोनिशाना नरहेको उल्लेख गर्दै दशैंअघि खुल्ला गर्न नसकिने बताउनुभयो । तर, राजमार्गमा फसेका गाडीहरुको उद्धारको काम भने नरोक्ने मन्त्री दाहालले बताउनुभयो ।
सांसदहरुले कुनै उपाय अपनाएर भए पनि बीपी राजमार्ग खोल्न आग्रह गरेका थिए । बीपी राजमार्गको चौकीडाँडा-कालढुंगा खण्डको १८ किलोमिटर सडक पूर्ण रुपमा बगेका कारण बीच-बीचमा सवारीसाधन रोकिएका छन् ।
