काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले बाढी, पहिरो र डुबानप्रभावित जिल्लाका स्थानीय तहलाई विपद संकटग्रस्त घोषणा गर्न सिफारिस गरेको छ ।
गृह मन्त्रालयमा आज बसेको प्राधिकरणको कार्यकारिणी समितिको बैठकले बाढी प्रभावित १४ जिल्लाका विभिन्न स्थानीय पालिकाहरुलाई विपद संकटग्रस्त घोषणा गर्न सरकारलाई सिफारिस गरेको गृह प्रवक्ता ऋषिराम तिवारीले जानकारी दिनुभयो ।
समितिले सिफारिस गरेका बाढी प्रभावित जिल्लाहरुमा पाँचथर, ओखलढुङगा, उदयपुर, सर्लाही, रौतहटलगायत सिन्धुली, मकवानपुर, चितवन, ललितपुर, सिन्धुपाल्चोक, दोलखा, रामेछाप र काभ्रे जिल्लाका पालिकाहरु छन् ।
सिंहदरबारमा बसिरहेको मन्त्रिपरिषद्को बैठकले प्राधिकरणको सिफारिसअनुसार विपद् संकटग्रस्त घोषणा गर्ने तयारी गरिरहेको छ ।
