बर्दियाको गुलरिया नगरपालिका-१२ भैसाहीमा रहेको यो घर ६० वर्षीय जगमोहन थारुको हो । उहाँका तीन पुस्ताका ४४ जना यही घरमा बस्दै आएका छन् । परिवारको छाक टार्न दैनिक करिब १५ किलो चामल नभई हुँदैन । घरको व्यवस्थापन जगमोहन आफैंले गर्नुहुन्छ । कामको बााडफाँट पनि गरिएको छ ।
मिठो मसिनो पकाउन त दैनिक खर्च नै धेरै । परिवारलाई मासु खुवाउनु परे सिंगै खसी चाहिन्छ । वर्षमा एक पटक परिवारमा सबैलाई नयाँ लुगा किन्ने नियम बनाइएको छ । सामान्य किसिमकै भए पनि एक पटकमा सबैलाई लुगा किन्दा १ लाख २० हजार रुपैयाँभन्दा कमले पुग्दैन । सासु-बुहारी, छोरा-छोरी सबै मिलेर काम गर्दछन् ।
थारु परिवारको नाममा ११ विघा जमिन छ । यसमा लगाइएको बालीले यति ठूलो परिवारलाई वर्षभरी खान पुग्दैन । थप ५ विघा जग्गा बटैया गर्दै आएको यो परिवारले घरको सम्पूर्ण काम आफैंले गर्दै आएको छ ।
यो परिवारका कतिपय सदस्य विदेशमा गएका छन् त कतिपय स्वदेशमै रोजगारीमा संलग्न छन् । तर उनीहरुले अंशबण्डा गरेका छैनन् । तर गाउँका अरु परिवारमा यस्तो भेटिँदैन ।
जगमोहनका परिवारमा एक अर्काप्रतिको स्नेह पनि कम लोभलाग्दो छैन । छिमेकी र गाउँले उहाँको परिवारको अनुशासन र एक अर्काप्रतिको भरोसा देखेर अचम्मै मान्ने गरेका छन् ।
