बर्दिया । बिहीबार घाँसदाउरा लिन गएकी मधुवन नगरपालिका–८ की एक महिला सहित दुई जना बाघको आक्रमणबाट घाइते हुनु भएको छ । मधुवन–८ स्थित गणेश शिव सामुदायिक वन, कुसुम्बा घाटमा समूहमा घाँसदाउरा गरी रहेको समय उनीहरूमाथि बाघले आक्रमण गरेको थियो ।
कुसुम्बादेवी मन्दिर नजिकैको स्थानमा बाघले आक्रमण गरेको हो । नगरपालिकाका मेयर तेजबहादुर भाटका अनुसार घाइते हुनेमा सोही पालिकाको आठ नम्बर वडाका ४२ वर्षीय महम्मद अली र ३३ वर्षकी ममता तिरुवा हुनु हुन्छ । उहाँहरूमध्ये अली गम्भीर घाइते हुनु भएको छ । तिरुवा भने सामान्य घाइते हुनु भएको जिल्ला अस्पतालका डाक्टर विजय उपाध्यायले बताउनु भयो ।
केही समयदेखि भारतीय सीमावर्ती कतरनियाघाट वन्यजन्तु सेन्चुरीबाट आएको जीपीएस कलर जडित बाघ यस क्षेत्रमा देखापरेपछि स्थानीय प्रहरी प्रशासनले सर्वसाधारणलाई सचेत पार्दे आएको छ । सोही बाघले आक्रमण गरेको स्थानीयको अनुमान छ ।
