काठमाडौं । प्रमुख प्रतिपक्षी दल नेकपा माओवादी केन्द्रले अवरोध जारी राख्ने बताएपछि प्रतिनिधि सभा बैठक स्थगित भएको छ ।
प्रतिनिधिसभा बैठक आज १ बजेका लागि बोलाइएको थियो। तर एमाले सांसदले प्रयोग गरेको 'हिंसा' शब्द रेकर्डबाट नहटाएसम्म अवरोध जारी राख्ने माओवादीको अडान पछि बैठक सोमबार दिउँसो १ बजेसम्मका लागि सारिएको हो । यही भदौ १२ गतेको बैठकमा नेकपा एमालेका सांसद योगेश भट्टराईले माओवादीले सञ्चालन गरेको सशस्त्र संघर्षलाई हिंसा भनेपछि माओवादी केन्द्रले अभिलेखबाट हटाउन माग गरेको थियो ।
अघिल्लो बैठकमा सभामुखले उक्त शब्द असंसदीय नभएकाले रेकर्डबाट हटाउनु नपर्ने जानकारी गराएपछि माओवादीले सदन अवरोध गरेको थियो । सदन खुलाउने विषयमा सभामुख र संचेतकहरु बीच छलफल भएपनि सहमति जुटेको छैन ।
