काठमाडौं । नेवार समुदायमा आज गठेमंगल अर्थात् घण्टाकर्ण पर्व मनाइँदै छ ।
काठमाडौं लगायत नेवार समुदायको बसोबास रहेको विभिन्न जिल्लामा यो पर्व मनाइँदै छ । यसै अन्तर्गत पाल्पाको बजार क्षेत्रमा नर्कटको तीनखुट्टे लिंगाकृति "गठाँ मो" ठड्याइएको छ । दिनभर ठड्याइएको गठेमंगल घाम अस्ताएपछि ढालेर नदीमा लगेर विर्सजन गर्ने परम्परा रहिआएको छ ।
श्रावण चतुर्दशीका दिन मनाइने घण्टाकर्ण पर्व पश्चात् चाडपर्वको मौसम सुरु हुने संस्कृतिविद् मदन देउरालीले जानकारी दिनुभयो । खेती किसानीको काम सकिए लगत्तै नेवार समुदायमा पहिलो चाडका रूपमा श्रावण कृष्ण चतुर्दशीका दिन गठेमंगल मनाउने परम्परा छ ।
घण्टाकर्णकै दिन फलाम वा पित्तलको औंठी "गठाँ मो"मा छुवाएर लगाउने परम्परा समेत रहेको छ ।