काठमाडौँ । अदालतको अवहेलना मुद्दामा सिधा कुरा अनलाइन र युट्युब च्यानलका प्रकाशक, कार्यकारी सम्पादकविरुद्धको मुद्दामा सर्वोच्च अदालतले भदौ ६ गते फैसला सुनाउने भएको छ ।
सर्वोच्च अदालतको बृहत् पूर्ण इजलासले आज मुद्दाको सुनुवाइ गरी फैसला मिति तोकेको हो । सर्वोच्चले १५ दिनभित्र बहस नोट झिकाउन आदेश दिएको छ । ९ जना न्यायाधीशहरूको बृहत् पूर्णइजलासमा भएको सुनुवाइमा १५ दिनभित्र बहस नोट झिकाउन आदेश दिएको हो ।
सर्वोच्च अदालतले सिधा कुरा अनलाइनका सञ्चालक युवराज कँडेल र कार्यकारी सम्पादक नवीन ढुंगानालगायत विरुद्ध मुद्दामा गत जेठ ३० गते न्यायाधीश कुमार चुँडाल र विनोद शर्माको इजलासले मुद्दालाई बृहत् पूर्णइजलासमा पठाउने आदेश गरेको थियो । सोही अनुसार आज त्यसको पहिलो सुनुवाइ भएको हो ।
प्रधानन्यायाधीश विश्वम्भरप्रसाद श्रेष्ठ , न्यायाधीशहरू प्रकाशमान सिंह राउत, सपना प्रधान मल्ल, प्रकाशकुमार ढुंगाना, हरिप्रसाद फुयाँल , नहकुल सुवेदी, विनोद शर्मा, महेश शर्मा पौडेल, बालकृष्ण ढकालसहितको इजलास बसेको थियो ।
यसअघिको इजलासले डार्क फाइलका नाममा सर्वोच्च अदालतका न्यायाधीश, सञ्चार उद्यमी र कानुन व्यवसायी समेतलाई मुछेर डार्क फाइल नामको नक्कली अडियो टेप बनाएको भन्दै फौजदारी कसुरमा अनुसन्धान गर्न आदेश दिएको थियो । सोही अनुसार जिल्ला अदालत काठमाडौं मुद्दा दायर भइसकेको छ ।