काठमाडौं । सौर्य एयरलाइन्सको विमान पोखरा उड्ने क्रममा सन्तुलन गुमाएर त्रिभुवन विमानस्थलमा दुर्घटनामा पर्यो । विमानमा तत्काल आगो लाग्यो । विमानमा सवार १९ जनामध्ये १८ जनाको मृत्यु भयो भने पाइलट मनिषरत्न शाक्यको मात्र सकुशल उद्धार भयो ।
आँखा र टाउकोमा चोट लागेको अवस्थामा उद्धार गरिएका क्याप्टेन शाक्यको काठमाडौं मेडिकल कलेजमा उपचार भइरहेको छ । अस्पताल स्रोतका अनुसार क्याप्टेन शाक्य बोल्ने अवस्थामा हुनुहुन्छ भने उहाँको शरीरमा जलन देखिएको छैन । पाइलट शाक्यको शरीरमा चोट लागेको छ ।
३५ वर्षीय शाक्य २०७७ माघदेखि सौर्य एयरलाइन्सको सञ्चालन निर्देशक हुनुहुन्छ । फिलिपिन्सबाट पाइलटको प्रारम्भिक तालिम सकेर आएपछि सन् २००९ मा उहाँले नागरिक उड्डयन प्राधिकरणबाट लाइसेन्स पाउनु भएको थियो । तत्कालीन गुण एयरलाइन्सबाट को-पाइलटका रुपमा काम थाल्नु भएका उहाँ सौर्य एयरलाइन्समा सन् २०१४ देखि कार्यरत हुनुहुन्छ ।
सन् २०१६ मा तालिमका लागि अमेरिका गएर पाइलटको लाइसेन्स लिनु भएको थियो । सन् २०१७ देखि उहाँले क्याप्टेनका रुपमा सौर्यको जेट इन्जिन जहाज उडान गर्न थाल्नु भएको थियो । २०१८ मा कम्पनीको ट्रेनिङ म्यानेजर पदमा नियुक्त भएपछि समग्र चालक दलको तालिम व्यवस्थापन गर्दै आएकोमा २०७७ देखि सञ्चालन निर्देशकको जिम्मेवारी सम्हाल्दै आउनु भएको थियो ।
सम्बन्धित समाचार...
