काठमाडौं । यो वर्षको मनसुन सुरु भएयता विपद्का घटनामा अहिलेसम्म एक सय ३० जनाको मृत्यु भएको छ ।
गृहमन्त्री रमेश लेखकले संसद्लाई जानकारी दिँदै विपद्का एक हजार पाँच सय ९२ घटनामा एक सय ४४ घाइते र ४८ जना बेपत्ता भएको जानकारी दिनुभयो । अहिलेसम्म ५९४ पशु चौपायाको नोक्सानी भएको, २३१ घरमा क्षति पुगेको, ४३ वटा साना-ठुला पुल र दुईवटा सरकारी भवन भत्केका तथा ४ हजारभन्दा धेरै परिवार विस्थापित भएको पनि गृहमन्त्रीले बताउनुभयो ।
७७ वटै जिल्ला विपद्बाट प्रभावित भएको भन्दै गृहमन्त्री लेखकले चितवनको सिमलताल पहिरोमा बगेका दुईवटा बसका बेपत्ता ६२ मध्ये २४ जनाको शव फेला परेको पनि सदनलाई जानकारी दिनुभयो ।