दोलखा । गत असार २२ गते राति दोलखाको गौरीशंकर गाउँपालिका- ९ रोल्वालिङ खोलामा अचानक आएको बाढी पहिरोका कारण नभै हिमताल फुटेका कारण भएको खुलेको छ ।
नाँ र बेदिङको उच्च भेगमा रहेको दोर्जी फुङमो हिमताल फुट्दा रोल्वालिङ खोलामा बाढी आएको पुष्टि भएको हो । करिब ९ सय मिटर लम्बाइको हिमताल असार २२ गते राति ९ बजेतिर ठोलो आवाजमा विस्फोट भएको स्थानीयले बताएका छन् । हिमताल विस्फोटले केहीबेर रोल्वालिङ खोला थुनिएको र त्यसपछि बाढीको रूप लिएको ११ पटकका सगरमाथा आरोही स्थानीय दाबा छिरिङ शेर्पाले बताउनुभयो ।
बाढीले फट्के र झोलुङ्गे पुल बगाएपछि त्यहाँ एक सातादेखि अलपत्र पर्यटकको शनिबार नेपाली सेनाको हेलिकप्टरमार्फत उद्धार गरिएको छ ।
यस्तै बाढीका कारण सदरमुकामसँग सम्पर्क टुटेको नाँ र वेदिङ गाउँमा हेलिकप्टरमार्फत खाद्यन्न पुर्याइएको छ । बाढीले एक जना महिलालाई बेपत्ता बनाएको थियो भने रोल्वालिङ पदमार्गको डोगाङमा रहेका सबै साना ठूला ८ वटा होटलसमेत बगेका थिए ।
