काठमाडौं । यस वर्ष बाढीपहिरो, भारी वर्षा तथा चट्याङजस्ता विपद्जन्य घटनाबाट ८५ जनाको मृत्यु भएको सरकारले जनाएको छ ।
राष्ट्रिय सभा बैठकमा विनियोजन विधेयकमाथि सांसदहरुले उठाएका प्रश्नको उपप्रधानमन्त्री तथा गृहमन्त्री रवि लामिछानेका तर्फबाट जवाफ दिँदै श्रममन्त्री डोलप्रसाद अर्यालले यस वर्षको विपद्जन्य घटनाको तथ्यांक प्रस्तुत गर्नु भएको हो ।
उहाँले ५५ वटा बाढीका घटनाबाट ४ जनाको मृत्यु, एक जना घाइते र २ जना बेपत्ता भएको र पहिरोबाट २४ जनाको मृत्यु र १ जना घाइते भएको जानकारी दिनुभयो ।
यस्तै, भारी वर्षाबाट २८ जनाको मृत्यु र ४ जना घाइते भएको तथा चट्याङबाट १९ जनाको मृत्यु भएको मन्त्री अर्यालले बताउनुभयो ।
आगामी आवको बजेट राष्ट्रिय सभाबाट सर्वसम्मत पारित
उहाँले विपद् व्यवस्थापनका लागि मनसुन पूर्वतयारी र प्रतिकार्य राष्ट्रिय कार्ययोजना कार्यान्वयनमा ल्याइएको र जोखिमयुक्त क्षेत्रलाई उचित संरक्षण हुने गरी क्षेत्र तथा निकायगत जिम्मेवारी तोकिएको जानकारी दिनुभयो ।
यस्तै मन्त्री अर्यालले श्रम मन्त्रालयमाथि उठेका प्रश्नको जवाफ दिँदै विदेश जाने श्रमिकहरु नठगिने र म्यानपावर व्यवसायीहरुले पनि वैध रुपमा मात्रै रकम लिन पाउने गरी अध्ययन भइरहेको र छिटै कार्यविधि बनाउने पनि बताउनुभयो ।
यस्तै शिक्षामन्त्री सुमना श्रेष्ठले विद्यालय शिक्षा सुधारका लागि शिक्षक सरुवा कार्यविधि बनाइएको र विद्यालय रुपान्तरण कार्यक्रमसमेत सञ्चालन गरिएको जानकारी दिनुभयो । यस्तै, विषयगत शिक्षकको अभाव हटाउन एक हजार विद्यार्थीलाई तालिम दिएर पठाउन लागिएको पनि उहाँले बताउनुभो । मन्त्री श्रेष्ठले २०६९ देखि रोकिएको सीटीईभीटीअन्तर्गतका नर्सिङ कलेजको सम्बन्धन मापदण्ड बनाएर पुनः खुलाउनुपर्ने बताउनुभयो ।
यस्तै, अर्थ मन्त्रालय तथा उद्योग, वाणिज्य तथा आपूर्ति, कृषि तथा पशुपन्छी विकास, भौतिक पूर्वाधार तथा यातायात र खानेपानी मन्त्रालयमाथि उठेका प्रश्नको जवाफ अर्थमन्त्री वर्षमान पुनले दिनुभएको थियो ।
