कैलाली । लगातारको वर्षापछि सुदूरपश्चिमका कैलाली र कन्चनपुरका विभिन्न स्थान डुबानमा परेका छन् । कैलालीको भजनी र टीकापुर नगरपालिका तथा कैलारी गाउँपालिकामा १ सय ४१ घर डुबानमा परेका छन् ।
डुबानमा परेका १ सय ४१ परिवारका पाँच सय ९१ विस्थापितलाई नजिकैको विद्यालयमा सारिएको कैलालीका प्रमुख जिल्ला अधिकारी धर्मेन्द्रकुमार मिश्रले बताउनुभएको छ । त्यसैगरी कञ्चनपुरको सुडामा कल्भर्ट भत्किएपछि महेन्द्र राजमार्ग अवरुद्ध भएको छ ।
दोधारा चाँदनी नगरपालिका वडा नम्बर ६ को पत्थर नालामा जोगबुढा नदी बस्तीमा पस्दा विस्थापित भएकाहरुलाई स्थानीय भानु माविमा सारिएको छ । भीमदत्त नगरपालिकाका अधिकांश स्थान पनि डुबानमा परेको बताइएको छ ।
जल तथा मौसम पूर्वानुमान महाशाखाका अनुसार सुदूरपश्चिमका विभिन्न क्षेत्रमा रातभर भारी वर्षा भएको छ । महाकालीसहित विभिन्न तथा खोलामा जलसतह खतराको तहभन्दा माथि पुगेको छ । सतर्कता अपनाउन मौसम पूर्वानुमान महाशाखाले जनाएको छ ।
