सप्तरी । सप्तरीको कञ्चनरुपमा रहेको सरदार टोलमा आगलागीका कारण ११ परिवारको २४ घर जलेका छन् ।
हिजो दिउँसो तीन बजे गोठबाट सल्केको आगोले उक्त बस्तीमा बस्दै आएका एकसय हाराहारीका स्थानीयको बिचल्ली भएको हो ।
आगलागीमा सर्वस्व गुमाएकाहरू गएराति खुला आकाशमुनि रात बिताउन बाध्य भए । आगलागीबाट करिब ४० लाख बढीको क्षति भएको पीडितहरूको भनाइ छ ।
आगोलाई सुरक्षाकर्मी, स्थानीय र तीनवटा दमकलको सहयोगमा नियन्त्रणमा लिइएको थियो । सप्तरीका प्रमुख जिल्ला अधिकारी किरण थापा नेतृत्वको सुरक्षा अधिकारीको टोलीले आगलागी भएको स्थानको अनुगमन गर्दै राहत वितरणको तयारी गरिरहेको बताएको छ ।