काठमाडौं । महालेखापरीक्षकमा तोयम रायाको नाम संसदीय सुनुवाइ समितिले अनुमोदन गरेको छ ।
संसदीय सुनुवाइ समितिको आज बसेको बैठकले रायालाई महालेखापरीक्षकमा अनुमोदन गरेको सभापति पशुपतिशमशेर राणाले जानकारी दिए ।
बैठकमा उपस्थित रायाले समितिसमक्ष पेस गरेको १५ पृष्ठको कार्ययोजनामा महालेखा परीक्षक कार्यालयको संगठन पुनर्संरचना गर्नुपर्ने बेला आइसकेको जनाएका थिए । संघीय शासन प्रणाली मुलुकमा कार्यान्वयनमा आइसके पनि महालेखा परीक्षकको संगठन संरचना भने केन्द्रीकृत नै रहेको भन्दै उनले पुनर्संरचनाको आवश्यकता रहेको बताए ।
रायाले प्रदेशमा महालेखा परीक्षक कार्यालय खोल्नुपर्नेसमेत धारणा राखेका छन् । उनले लेखापरीक्षणका मापदण्ड तथा लेखापरीक्षणका नीतिहरूलाई संघीयताअनुकूल निरन्तर रूपमा सुधार गर्दै लगिने जनाए ।
राष्ट्रिय तथ्यांक कार्यालयका सचिव रायालाई गत चैत १८ गते बसेको संवैधानिक परिषद् बैठकले महालेखापरीक्षकमा सिफारिस गरेको थियो ।
