काठमाडौं । अख्तियार दुरुपयोग अनुसन्धान आयोगले ३३ औँ स्थापना दिवस आज विभिन्न कार्यक्रम गरी मनाउँदै छ ।
'सुधारौँ सोच, संस्कार र व्यवहार: नियन्त्रण हुन्छ भ्रष्टाचार' भन्ने मूल नाराका साथ अख्तियारले आफ्नो स्थापना दिवस मनाउँदै छ। सार्वजनिक पद धारण गरेका व्यक्तिले अख्तियार दुरुपयोग गरेकोबारे अनुसन्धान गर्ने जिम्मेवारीसहित संवैधानिक निकायका रूपमा २०४७ सालमा आयोग स्थापना गरिएको हो ।
अख्तियारले आफ्नो हटलाइन नम्बरदेखि हुलाक र विभिन्न सामाजिक सञ्चालनमार्फत समेत उजुरी र गुनासो संकलन गर्दै आएको छ ।
आयोगले स्थापनादेखि अहिलेसम्म अख्तियार दुरुपयोग भएका विषयमा अनुसन्धान र छानबिन गरी भ्रष्टाचार गरेको देखिएमा अदालतमा मुद्दा दर्ता गर्दै आइरहेको छ । आयोगका केन्द्र र ७ वटै प्रदेश कार्यालयमा गरी पुससम्म २२ हजार १ सय २७ उजुरी छन् । तर, आयोगले विशेष अदालतमा दायर गरेका मुद्दामा ७० प्रतिशतभन्दा बढीमा दाबी विपरीत फैसला हुनुले अख्तियारको अनुसन्धान क्षमतामाथि भने प्रश्न उठ्दै आएको छ ।
पछिल्लो समय आयोगमा परेका उजुरीमध्ये ५० प्रतिशत स्थानीय तहसँग सम्बन्धित छन् । स्थानीय तहपछि अख्तियारमा भूमि र शिक्षासँग सम्बन्धित उजुरी धेरै छन् ।
