काठमाडौं । आज यमपञ्चकको पहिलो दिन । प्रत्येक वर्ष कात्तिक कृष्ण त्रयोदशीदेखि सुरु हुने नेपाली हिन्दुहरुको दोस्रो ठूलो चाड तिहार अर्थात् यमपञ्चक आज सुरु भएको छ । यमदूत मानिने कागको पूजा गरी आज काग तिहार मनाइँदै छ ।
आजको दिन कागको पूजा गरी मिठो खानेकुरा दिने गरिन्छ । कागलाई दही र भात खुवाएमा उसले यमराज समक्ष राम्रो सन्देश लगिदिन्छ भन्ने मान्यता छ । काग तिहारका अवसरमा आज काठमाडौंको कागेश्वरीमा मेला आयोजना गरिएको छ ।
आज बिहानै श्रद्धालुहरु काठमाडौंको कागेश्वरी नगरपालिकास्थित कागेश्वरी महादेव मन्दिरमा कागको पुजा गरे ।
कार्तिक त्रयोदशी तिथि परेकोले आज बेलुकी यम दीप दान सुरु गर्नुपर्ने पञ्चाङ्ग निर्णायक समितिले जनाएको छ । यमपञ्चकमा यम दीप दान गरेमा यमयातनाबाट मुक्ति पाइने मान्यता पनि छ ।
तिथिका कारण धनतरेस पर्व आज पनि मनाइँदै छ ।
भोलि बिहान कुकुर तिहार र लक्ष्मीपूजा भोलि नै साँझ मनाउनुपर्ने पञ्चाङ्ग निर्णायक विकास समितिले जनाएको छ । भाइटीका २९ गते बुधबार परेको छ । त्यसदिन बिहान १० बजेर ५१ मिनेटमा टीकाको उत्तम साइत रहेको पनि समितिले जनाएको छ ।
नेवार समुदायले यसदिन किजापूजा मनाउँछन् ।
सम्बन्धित समाचार...
