काठमाडौं । नेपालले इजरायलमा भएको आतंकवादी हमलाको निन्दा गर्दै इजरायल सरकारप्रति ऐक्यबद्धता जनाएको छ । साथै सरकारले हमलामा अमूल्य जीवन गुमेकामा तथा धेरै मानिस घाइते भएकोप्रति दुःख व्यक्त गरेको छ ।
परराष्ट्र मन्त्रालयले विज्ञप्ति जारी गरी इजरायली भूमिमा आंतकवादी आक्रमण भएको भन्दै आलोचना गरेको हो ।
इजरायल सरकार तथा त्यहाँका जनताका साथै हमलामा परी जीवन गुमाएकाहरूका परिवारप्रति गहिरो सहानुभूति एवं समवेदना व्यक्त गरेको छ । नेपाल सरकारले घाइतेहरूको शीघ्र स्वास्थ्य लाभको कामना पनि गरेको छ ।
आतंकवादी आक्रमणमा नेपाली पनि परेका परराष्ट्र मन्त्रालयले जनाएको छ। आक्रमणमा परेका नौ जना नेपालीमध्ये दुई जनाको अवस्था सिकिस्त रहेको छ । यससम्बन्धी थप विवरण अद्यावधिक गरिने मन्त्रालयले जनाएको छ ।
इजरायलमा भएको आक्रमणमा ९ नेपाली घाइते, दुईको अवस्था चिन्ताजनक
इजरायलस्थित नेपाली दूतावासले आक्रमण प्रभावित क्षेत्रमा बसोबास गरेका नेपालीसँग निकट सम्पर्कमा रहेको जनाउँदै नेपालीको सुरक्षा तथा उद्धारका साथै घाइतेहरूको उपचारका लागि पनि इजरायली अधिकारीहरूसँग सम्पर्क र समन्वय गरिरहेको परराष्ट्रले जनाएको छ ।
इजरायलको वर्तमान स्थितिलाई दृष्टिगत गरी त्यहाँ रहेका सबै नेपालीलाई सतर्क रहन तथा सम्बद्ध अधिकारीले दिएका सुरक्षा उपायको अक्षरसःपालन गर्न सरकारले अनुरोध गरेको छ ।
इजरायलस्थित नेपाली दूतावासको सम्पर्क विवरण पनि सरकारले उपलब्ध गराएको छ ।
