हुम्ला । खराब मौसम र नागरिक उड्डयन प्राधिकरणको नियमका कारण जहाजको उडान नहुँदा हुम्लामा बिरामीले अकालमै ज्यान गुमाउनुपरेको छ ।
हुम्लाको सिमकोटमा रहेको सिमकोट विमानस्थलमा लामो समयदेखि हवाई उडान नहुँदा चार बालबालिकाले ज्यान गुमाएका छन् । यस्तै आज (मंगलबार) पनि विमानस्थलमा जहाज उड्छ कि भन्ने प्रतीक्षामा बिरामी ल्याइएको छ ।
हुम्लामा बिहान मौसम सफा नहुनु र दिउँसो साढे १२ बजेपछि उडान भर्न नपाउने प्राधिकरणको नियमका कारण लामो समयदेखि हवाई उडान हुन सकेको छैन । जसका कारण बिरामी तथा सर्वसाधारण मर्कामा परेका छन् । मंगलबार पनि खार्पुनाथ ५ खर्पेलगाउँ हुम्लाकी दिफकली सार्की थप उपचारका लागि सुविधासम्पन्न अस्पताल जानुपर्ने भए पनि विमानस्थल परिसरमा जहाज कुरेर बस्नुपर्यो ।
साउन १६ गते सुत्केरी भएकी दिफकलीको रगतमा संक्रमण भएर रिफर गरेको पाँच दिनपछि उद्धारका लागि आज (मंगलबार) विमानस्थलमा प्रतीक्षारत थिइन् । उनलाई नियमित जहाजको उडान नहुने भएपछि नेपाली सेनाको हेलिकोप्टर उद्धार गर्ने तयारी गरेको छ ।
उनी सेनाको जहाजको प्रतीक्षामै विमानस्थलमा छिन् ।
हुम्लाको सिमकोट ६, माथिल्लो गाउँका ६ महिने बालक इमरान सुनार, सिमकोट गाउँपालिका ७, डाँडाफयाका ७ महिने बालक रोहित शाही, खार्पुनाथ १, लालीका डेढ वर्षका बालक आर्यन परियार र चंखेली ४ का पाँचमहिने बालक सन्देश लुवारको जहाज नआउँदा उपचार अभावमा ज्यान गएको हो ।
अस्पताल ल्याइका शाहीलाई अनियन्त्रित झाडापखालाका कारण आईसीयूमा उपचार गर्नुपर्ने भएपछि सुविधा सम्पन्न अस्पताल लैजान भनिएको थियो । तर जहाज नआउँदा घरै फिर्ता लगिएका बालक शाहीको गत बुधबार मृत्यु भएको थियो ।
यस्तै झाडापखालाकै कारण सिकिस्त भएका इमरान सुनारलाई पनि सुविधा सम्पन्न अस्पताल लैजान नसक्दा बचाउन नसकिएको जिल्ला अस्पताल हुम्लाका चिकित्सक कैलाश लामाले जानकारी दिए । झाडापखालाले थलिएका उनको रगतमा संक्रमण देखिएपछि साउन १८ गते जिल्ला बाहिरका सुविधा सम्पन्न अस्पताल लैजान अस्पतालले सुझाव दिएको थियो ।
अस्पतालका चिकित्सक लामाका अनुसार निमोनियाँले थलिएका परियारको साउन ७ गते र कुपोषणले थलिएका लुवारको साउन ८ गते जहाज कुर्दाकुर्दै अस्पतालको शय्यामै ज्यान गुमाउनुपर्यो । जहाज नआउँदा समयमै सुविधा सम्पन्न अस्पतालमा लैजान नसक्दा ५, ६ र १८ महिनाका बालकको अस्पतालको बेडमै र ७ महिनाका बालकको उनकै घरमा मृत्यु भएको हो ।
यसैबीच पूर्ववत अवस्थाकै हवाई उडान हुनुपर्ने भन्दै हुम्लाका बासिन्दाले नागरिक उड्डयन प्राधिकरणलाई ४८ घण्टे अल्टिमेटम दिएका छन् । उनीहरुले प्रमुख जिल्ला अधिकारीमार्फत संघ सरकारको ध्यानाकर्षण गराउँदै प्राधिकरणलाई साउन १२ गतेको निर्णय फिर्ता लिन ४८ घण्टे अल्टिमेटम दिएका हुन् ।
आफूहरुको मागप्रति गम्भीर हुन आग्रह गर्दै ज्ञापनपत्र बुझाएका हुम्लाका अगुवाहरुले प्राधिकरणको निर्णय अमान्य र अव्यवहारिक भएकाले आन्दोलित हुनुपर्ने अवस्था आएको जनाएका छन् ।
प्राधिकरणले गत साउन १२ गते गरेको निर्णयअनुसार आन्तरिकतर्फको हवाई उडान कार्यतालिकाको कारण हुम्लाका साथै हिमाली जिल्लाका २९ वटा विमानस्थलमा हवाई उडान प्रभावित हुँदै आएको छ ।
यो पनि...
जहाज कुर्दाकुर्दै हुम्लामा चार शिशुको मृत्यु, आन्दोलन गर्ने स्थानीयको चेतावानी
साढे १२ बजेपछि उडान रोक्ने निर्णय सच्याउन प्राधिकरणलाई हुम्लावासीको ४८ घण्टे अल्टिमेटम
