काठमाडौं । नेपालका ३० औं प्रधानन्यायाधीश हरिकृष्ण कार्कीले कायममुकामय प्रधानन्यायाधीश भएर काम गरेका ९ महिनापछि आजदेखि न्यायपालिकाको नेतृत्वको जिम्मेवारी सम्हालेका हुन् । लामो रस्साकस्सी र राजनीतिक खिचातानीकाबीच साउन २० गतेसम्मका लागि प्रधानन्यायाधीश बनेका कार्की को हुन् त ?
२०१५ साल साउन २० गते ओखलढुंगामा जन्मिएका कार्की २०४० सालमा कानुनमा स्नातक गरेपछि अधिवक्ताका रुपमा व्यवसाय सुरु गरे । विभिन्न सरकारी तथा गैरसरकारी कार्यालयको कानुनी सल्लाहकारको जिम्मेवारीसमेत निर्वाह गर्दै आएका कार्की २०७० सालमा वरिष्ठ अधिवक्ता भए । उनी २०६९ माघदेखि ३ वर्ष नेपाल बार एसोसिएसनको निर्वाचित अध्यक्ष बने । बारको अध्यक्षको कार्यकाल पूरा नगर्दै केपी शर्मा ओली पहिलो पटक प्रधानमन्त्री हुँदा २०७२ असोज २८ गते महान्यायाधिवक्तामा नियुक्ति भए । करिब ५ महिना महान्यायाधिवक्ताको जिम्मेवारी सम्हालेका उनलाई संवैधानिक परिषद्ले २०७२ फागुन १८ गते सर्वोच्चको न्यायाधीशमा सिफारिस गर्यो । लगत्तै उनले महान्यायाधिवक्ताको जिम्मेवारी छाडेका थिए ।
कार्की २०७३ साउन १७ गते सर्वोच्च अदालतको न्यायाधीशमा नियुक्त भए । आगामी साउन २० गते ६५ वर्षे उमेर हदका कारण अनिवार्य अवकास पाउने प्रधानन्यायाशीश कार्कीले ५१ दिन न्यायपालिकाको नेतृत्व गर्नेछन् ।
यो छोटो अवधिमा उनलाई आफैँले तयार गरेको न्यायपालिका सुधार प्रतिवेदन कार्यान्वयन गर्न र न्यायपालिकामाथीको विश्वास बढाउन सहज भने छैन । त्यसैले कार्कीले पनि न्यायालयमाथि विश्वासको वातावरण बनाउँदै ठोस एवम् नतिजामूलक कार्यसम्पादनको वातावरण बनाउन कत्तिको सक्लान् त ?
सम्बन्धित समाचार...
नवनियुक्त प्रधानन्यायाधीश कार्कीले लिए पद तथा गोपनीयताको सपथ, आजै गरे पदभार ग्रहण
