काठमाडौं । नक्कली भुटानी शरणार्थी प्रकरणमा उच्चपदस्थलाई पक्राउ गरी प्रहरीले अनुसन्धान गरिरहेको अवस्थामा दलका भ्रातृ संगठनहरु पनि भ्रष्टाचारविरुद्ध प्रदर्शनमा उत्रिएका छन् ।
सोमबार काठमाडौंमा एमाले निकट युवा संघ र विद्यार्थी संगठन अनेरास्ववियुले प्रदर्शन गरेका छन् । अनेरास्ववियु र युवा संघले स्थापना दिवसको अवसर पारेर भ्रष्टाचारविरुद्ध प्रदर्शन गरेका हुन्। अनेरास्ववियुको र्याली काठमाडौंको प्रदर्शनी मार्गबाट सुरु भएको छ । ५८ औं वर्ष पूरा गरी ५९ औं वर्षमा प्रवेश गरेको अनेरास्वियुले जनाएको छ ।
राष्ट्रिय युवा संघ नेपालको ३४ औँ स्थापना दिवसको अवसरमा कमलादीस्थित नेपाल प्रज्ञा प्रतिष्ठानमा कार्यक्रम आयोजना गरिएको छ। कार्यक्रम स्थल पुग्नु अगाडि र्याली निकालिएको थियो । यस्तै, नेपाल ट्रेड युनियन महासंघ (जिफन्ट) ले पनि भ्रष्टाचारविरुद्ध प्रदर्शन गरेको छ ।
प्रदर्शनमा सहभागीहरुले ‘दोषी नभागुन्, निर्दोष नफसुन्,’ ‘यो ऊ भन्दैनौँ, भ्रष्टाचार सहन्नौँ,’ ‘हाम्रो भविष्य, भ्रष्टाचार मुक्त नेपाल’लगायतका नारा लगाइएको छ ।
यसअघि शनिबार काठमाडौं, पोखरालगायत देशका विभिन्न स्थानबाट नागरिक समाजले भ्रष्टाचारविरुद्ध खबरदारी गरेको थियो ।
