काठमाडौं । पूर्वमन्त्री एवं एमाले सचिव टोपबहादुर रायमाझी काठमाडौं आइपुगेका छन् ।
भैरहवा विमानस्थलबाट बुधबार काठमाडौं आउन नसकेका उनी साँझ सडकमार्ग हुँदै काठमाडौं आइपुगेका हुन् । उनी हाल काठमाडौंमै भएको उनको सचिवालयले जनाएको छ ।
बुधबार दिनभर उनी सभामुख देवराज घिमिरेसँगै गृह जिल्ला अर्घाखाँचीको कार्यक्रममा व्यस्त थिए । सभामुख घिमिरेसँगै विमानमार्फत काठमाडौं आउन लागेका उनले अन्तिम समयमा टिकट क्यान्सिल गरेका थिए ।
काठमाडौं आइपुग्ने बित्तिकै पक्राउ पर्ने जानकारी पाएपछि उनी सडकमार्गबाट काठमाडौैं हिँडेका थिए ।
रायमाझी प्रहरीको उच्च निगरानीमा छन् । उनको छोरा सन्दीप भने बुधबारै बुटवलबाट पक्राउ परिसकेका छन् ।
उनलाई म्याद थपका लागि जिल्ला अदालत काठमाडौंमा आज पेस गरिँदै छ ।
नेपाली नागरिकलाई नक्कली भुटानी शरणार्थी बनाएर अमेरिका पठाउने प्रकरणमा पूर्वमन्त्री रायमाझी र उनको छोरा सन्दीपको नाम मुछिएको छ ।
यो प्रकरणमा संलग्न रहेको आरोपमा बुधबारै उपराष्ट्रपति कार्यालयका सचिव टेकनारायण पाण्डे पक्राउ परेका थिए । हालसम्म नक्कली भुटानी शरणार्थी प्रकरणमा मुछिएका ८ जना पक्राउ परिसकेका छन् ।
पूर्वमन्त्री टोपबहादुर रायमाझीका छोरा सन्दीपलाई आज अदालतमा पेस गरिँदै
