तेह्रथुम । तेह्रथुमको आठराई गाउँपालिका ५, छातेढुंगास्थित होडा बस्तीमा आगलागी हुँदा चारवटा घर जलेका छन् । फेदीमा रहेको जंगलमा लागेको आगो बस्तीमा सल्किँदा चारवटा घर जलेको वडाध्यक्ष विष्णुप्रसाद ओलीले जानकारी दिए ।
आगलागीबाट भीम लिम्बू, अटलबहादुर राई, अमरबहादुर राई र जितेन्द्र राईको घर जलेर नष्ट भएका हुन् । आगो नियन्त्रणका लागि गाउँपालिकाको दमकल, प्रहरी र स्थानीयले बासिन्दा जुटेका छन् । बस्तीको बीचबीचमा जंगल रहेको र वेगिलो हावा चलिरहेकाले आगो नियन्त्रणमा कठिनाइ भएको वडाध्यक्ष ओलीको भनाइ छ ।
आगलागीबाट ३० लाख रुपैयाँभन्दा बढीको क्षति भइसकेको प्रारम्भिक अनुमान छ । दुई दिनअघि पनि छातेढुंगाकै अकबरे चोकमा आगलागी हुँदा एउटा घर जलेको थियो । जंगलमा लागेको आगो नियन्त्रणमा नआउँदा बस्तीका घरमा आगो लागिरहेका छन् ।
