काठमाडौं । राष्ट्रपति विद्यादेवी भण्डारीले हनुमानढोका दरबारस्थित नासलचोक पुगेर बिहीबार वसन्त श्रवण गरेकी छन् ।
राष्ट्र प्रमुखले सरस्वती पूजाका अवसरमा वसन्तपुर पुगेर वसन्त श्रवण गर्ने परम्परा छ । यो चलन राजा प्रताप मल्लको पालादेखि नै चल्दै आएको हो । सोही परम्पराअनुसार नासलचोक पुगेकि राष्ट्रपतिलाई नेपाली सेनाको एक टुकडीले सलामीसँगै पञ्चेबाजाले स्वागत गरेको छ ।
राष्ट्रपति भण्डारीले त्यहाँ पूजारीबाट फूलमाला, टीका र प्रसाद ग्रहणसमेत गरिन् । राष्ट्रपति भण्डारीले पनि वसन्त श्रवणको अवसरमा विद्याकी देवी सरस्वतीको पूजा आराधना गरिन् । वसन्त श्रवण समारोहमा राष्ट्रपति भण्डारीसहित उपराष्ट्रपति नन्दबहादुर पुन, प्रधानमन्त्री पुष्पकमल दाहाल, कायमुकायम प्रधानन्यायाधीश हरिकृष्ण कार्की, सभामुख देवराज घिमिरे र राष्ट्रियसभाका अध्यक्ष गणेशप्रसाद तिमिल्सनाको उपस्थिति थियो ।
वसन्तपञ्चमीका दिन देशभर विद्याकी देवी सरस्वतीको पूजा आराधना गर्ने गरिन्छ । वसन्त पञ्चमीको दिनमा वसन्त श्रवण गरेमा मात्रै पनि सुख, शान्ति र समृद्धि प्राप्त हुने शास्त्रोक्त कथन छ । वसन्त पञ्चमीको दिनबाट वसन्त ऋतु सुरुवात भएको मानिन्छ भने यस दिनबाट नै संसारको स्वरुपले नै नयाँ रुप लिने विश्वास रही आएको छ । हेरौं थप तस्बिर :
