काठमाडौंमा टुकुचा खोला उत्खनन् कार्य भइरहँदा पोखरामा भने सहरको बीच भाग हुँदै बग्ने फिर्के खोला दिन प्रतिदिन अतिक्रमण भइरहेको छ । खोलाको किनारबाट १० मिटर छोडेरमात्रै भौतिक संरचना निर्माण गर्न पाउने महानगरको मापदण्डविपरीत खोला मै संरचना बनेका छन् ।
पोखरामा फिर्के खोलाको मापदण्ड मिचेर सरकारी तथा व्यक्तिका साथै विभिन्न संघले भवन निर्माण गरिरहेका छन् । अधेारी कुनादेखि फेवातालसम्म करिव दुई सय घर फिर्केखोलाको सीमा भित्रै बनेका छन् । पाँचदेखि ३५ मिटरसम्म चौडाइ रहेको ८ किलोमिटर लामो फिर्के खोला धेरै ठाउामा अतिक्रमण भइसकेको छ । तीन वर्षअघि महानगरले खोला संरक्षणका लागि भन्दै अँधेरी कुनादेखि ड्यामसाइडसम्मको खोला किनार दुवैतर्फ पैदल मार्ग बनाउने योजना ल्याएको थियो । तर त्यो कागज मै सीमित बन्दा अस्थित्व नै हराउने हो कि भन्ने चिन्ता बढेको छ । महानगरले भुइँतला पार्किङ्ग खाली गर्न, फेवाताल अतिक्रमण रोक्न र कवाडी पसल हटाउन निर्देशन दिए पनि खोला अतिक्रमणबारे भने मौन छ । खोलाको मापदण्ड कडाईका साथ लागू गर्न नसकेको महानगरले मापदण्ड विपरित निर्माण गरिएका घरका लागि विजुली, खानेपानी लगायतका राज्यबाट दिईने सेवा सुविधाका लागि सिफारिस भने दिदै आएको छ ।
