पाँच सय बर्ष पुरानो इतिहास बोकेको महोत्तरीको मटिहानी मठको जग्गा अतिक्रमणको क्रम रोकिएको छैन । एतिहासिक सम्पदाको संरक्षणको जिम्मेबारी बोकेका तीनै तहका सरकार मठको जग्गामा विभिन्न संरचना बनाउन र अतिक्रमण गर्न सक्रिय छन् ।
महोत्तरी जिल्लाको मटिहानीमा रहेका लक्ष्मीनारायण मठको नाममा संघिय राजधानी काठमाडौं लगायत देशको विभिन्न जिल्लामा १३ सय विघा भन्दा बढि जग्गा रहेपनि ६ सय बिघा भन्दा बढि अतिक्रमण भएको छ । अतिक्रमित जग्गा खाली गराउन संघ र स्थानिय सरकारले चासो दिएका छैनन् ।
बाँकी रहेका मठका जग्गामा पनि विभिन्न संरचनाहरु बनाउन लागिएको छ । मिथिला परिक्रमा स्थलको ३ बिश्राम स्थलमा पर्यटन बिभागले १ करोड २९ लाख भन्दा बढिको लगानीमा शौचालय, गोलघर लगायतका संरचणा निर्माण गर्न लागेको हो । ऐतिहासिक तथा पुरातात्विक महत्वका यस मठको गरिमाको कुनै ख्यालै नगरी मुख्यद्वारमै निर्माण गर्न थालिएको सार्बजनीक शौचालयका लागि मान महन्त जगरनाथ दाश र मठिहानी नगरपालिकाका प्रमुख हरिप्रसाद मण्डलले पनि लिखित सहमति दिएका छन् ।
यति मात्र होईन एतिहासिक सम्पदाको संरक्षण गर्नुपर्ने जिम्मेबारी बोकेका स्थानिय सरकार नै मठको जग्गा अतिक्रमण गरेका छन् । सात करोड भन्दा बढिको लगानीमा मटिहानी नगरपालिकाले खेल मैदान, वडा कार्यालय स्वास्थ्य संस्था, सार्वजनीक शौचालय, लगायत भौतिक संरचणा निर्माण गरेका छन् । तर, नगरपालिकाले यसको संरक्षक गुठी संस्थानसंग अनुमति लिएको छैन । मठमन्दिर लगायत सार्बजनीक जग्गाको अतिक्रमण बढदै गएपनि प्रदेश सरकारले यसको प्रष्ट कानुन वनाउन सकेको छैन ।
रामानन्दीय बैष्णब सम्प्रदायको सबभन्दा अग्रणी संस्था मटिहानी मिथिला परिक्रमा पदयात्राको तेस्रो रात्रि बिश्राम स्थल पनि हो । तेत्रायुगमा दशरथ पुत्रराम र जनक नन्दनी जानकी बिचभएको विवाहमा यहीको माटोबाट बिवाह वेदी बनाइएको जनबिश्वास छ ।
