एजेन्सी । इरानले दक्षिण इजरायलको बेर्शेबास्थित सोरोका अस्पतालमा क्षेप्यास्त्र प्रहार गरेको छ ।
क्षेप्यास्त्र आक्रमणबाट अस्पतालको संरचनामा ठूलो क्षति भएको छ भने ३० जनाभन्दा बढी घाइते भएको प्रारम्भिक जानकारी सार्वजनिक भएको छ । अस्पतालले तत्काल उपचारका लागि नआउन नागरिकलाई आग्रह गरेको छ । बीबीसीका अनुसार अस्पतालमा दर्जंनौं मिसाइल आक्रमण भएका छन् । इजरायलले पनि इरानको आणविक हतियार केन्द्रमा आक्रमण गरेको दाबी गरेको छ ।
यसैबीच अमेरिकी राष्ट्रपति डनल्ड ट्रम्पले इरानमाथि आक्रमण गर्ने योजना स्वीकृत गर्नुभएको छ । तर आक्रमण गर्ने विषयमा अन्तिम निर्णय भने लिइनसकेको अन्तर्राष्ट्रिय सञ्चारमाध्यमले जनाएका छन् । राष्ट्रपति ट्रम्पले इरानका भूमिगत आणविक संरचनाहरूलाई निशाना बनाउने बंकर-बस्टिङ बमसमेत प्रयोग गर्न सकिने सैन्य योजनाबारे समीक्षा गरिरहनु भएको जनाइएको छ । ट्रम्पले आक्रमण योजनाको समीक्षा गरिसकेको भए पनि, इरान आफ्नो आणविक कार्यक्रमबाट पछि हट्छ कि हट्दैन भनेर कुर्न चाहनु भएको छ ।
यसैबीच, इरान, रूस, चीन, पाकिस्तान र अल्जेरियाको आग्रहमा शुक्रबार संयुक्त राष्ट्र संघको आकस्मिक बैठक बोलाउने निर्णय गरेको छ। हालैको द्वन्द्वका सम्बन्धमा बोलाइएको यो दोस्रो छलफल हो ।
इरान र इजरायलबीचको तनाव बुधबार राति सातौं दिन पनि जारी रहेको छ भने इरानले प्रहार गरेको ड्रोन नष्ट गरेको इजरायली सेनाले जनाएको छ ।
