एजेन्सी । इजरायलले गाजातर्फ राहत सामाग्री लिएर जाँदै गरेको माडलीन नामको पानीजहाजलाई रोक्ने प्रयास थालेको छ ।
समुद्री नाकाबन्दीको उल्लघंन गर्न लागेको भन्दै कारबाही गर्ने चेतावनी इजरायलले दिएको हो । अहिले उक्त जहाज गाजाबाट करिब एक सय ६० माइल टाढा रहेको बताइएको छ । जहाजमा जलवायु अभियन्ता ग्रेटा थुनबर्गसँगै मानव अधिकारकर्मी र शान्तिकर्मीहरु सवार छन् ।
इजरायली रक्षा मन्त्री इस्राएल काट्जले गाजाको समुद्री नाकाबन्दी तोड्न खोज्ने कुनै पनि प्रयास नसहने चेतावनी दिनुभएको छ ।
माडलीनमा सवार अभियानकर्मीहरूले भने जहाज निशस्त्र रहेको र मानवीय सहायता मात्र बोकेको बताएका छन् । इजरायलको अवरोध अन्तर्राष्ट्रिय कानुनको उल्लङ्घन भएको उनीहरुको आरोप छ । इजरायलले जहाजको सञ्चार अवरोध गरेर जोर्डन नजिकै देखिने बनाएको आरोप पनि उनीहरुले लगाएका छन् ।
यसैबीच, इजरायली अधिकारीहरू उक्त पानीजहाजमा प्रवेश गरिसकेको बीबीसीले जनाएको छ ।
यसअघि, सन् २०१० मा गाजातर्फ जाँदै गरेको टर्कीको मावी मरमारा नामक पानीजहाजमा इजरायली सेनाले आक्रमण गर्दा १० जनाको मृत्यु भएको थियो ।
